नेपालमा हालैका दिनहरूमा जेन जि (जनरेशन जेड) का युवाहरूको आन्दोलनले राजनीतिक र सामाजिक परिदृश्यमा ठूलो हलचल मच्चाएको छ। सामाजिक सञ्जालमा प्रतिबन्ध, भ्रष्टाचार, रोजगारीको अभाव र राजनीतिक अस्थिरताविरुद्धका मागहरूले सडक तातो बनेको छ। काठमाडौंका सडकहरूमा प्रदर्शनकारीहरूको उत्तेजना, संसद् भवनमा आगजनी र प्रधानमन्त्री केपी शर्मा ओलीको राजीनामासम्मका घटनाहरूले देशलाई संकटको घेरामा पुर्याएको छ। यस सन्दर्भमा प्रगतिशिल युवा संघ नेपालले स्पष्ट धारणा राखेको छ । जेन जिका यी मागहरू संवैधानिक प्रक्रियाबाटै सम्बोधन गर्नुपर्छ। हिंसात्मक बाटो होइन, लोकतान्त्रिक र कानुनी मार्ग नै समाधानको उत्तम विकल्प हो।
प्रगतिशिल युवा संघ नेपाल एक स्वतन्त्र र प्रगतिशील युवा संगठन हो, जसले देशको आर्थिक उन्नति, विकास र युवा रोजगारीलाई प्राथमिकता दिँदै आएको छ। संघका अनुसार, जेन जिका युवाहरूले उठाएका मुद्दाहरू जायज छन्। उनीहरूले सामाजिक सञ्जालको स्वतन्त्रता, शिक्षा र रोजगारीका अवसरहरू, भ्रष्टाचारविरुद्धको कडा कारबाही जस्ता मागहरू राखेका छन्, जसले नेपालको भावी पुस्तालाई प्रभावित पार्छ। तर, यी मागहरू पूरा गर्न हिंसा वा अराजकताको बाटो अपनाउनु भनेको देशलाई थप अन्धकारतर्फ धकेल्नु हो। प्रगतिशिल युवा संघ नेपाल सधैं जेन जिका आवाजलाई सम्मान गर्छौं, तर संविधानले दिएको लोकतान्त्रिक अधिकारको दुरुपयोग गर्नु हुँदैन। संवैधानिक निकायहरू जस्तै संसद्, सर्वोच्च अदालत र निर्वाचन आयोगमार्फत नै यी मुद्दाहरू सम्बोधन गर्न सकिन्छ।
नेपालको संविधान २०७२ ले युवाहरूलाई राजनीतिक सहभागिता, शिक्षा र रोजगारीको मौलिक अधिकार प्रदान गरेको छ। युवाको हित र संरक्षण, अभिव्यक्ति स्वतन्त्रताको ग्यारेन्टी गरेको छ। प्रगतिशिल युवा संघ नेपालको धारणा अनुसार, जेन जिका प्रदर्शनहरूले यिनै संवैधानिक प्रावधानहरूलाई बलियो बनाउनुपर्छ। उदाहरणका लागि, सामाजिक सञ्जाल प्रतिबन्धको मुद्दालाई सर्वोच्च अदालतमा विचाराधीन राखेर समाधान खोज्न सकिन्छ। भ्रष्टाचारविरुद्ध लोकपाल वा अख्तियार दुरुपयोग अनुसन्धान आयोगलाई सक्रिय बनाउन सकिन्छ। रोजगारीका लागि युवा तथा खेलकुद मन्त्रालयमार्फत नीतिगत सुधार ल्याउन सकिन्छ। यी सबै संवैधानिक ढाँचाभित्रै सम्भव छन्।
हिंसात्मक प्रदर्शनले ल्याउने क्षति गम्भीर हुन्छ। हालका घटनाहरूमा ५१ जनाको ज्यान गएको, सम्पत्तिको विनाश भएको र राजनीतिक अस्थिरता बढेको छ। जेन जिका युवाहरूले अमेरिकी प्रभाव वा बाह्य शक्तिको हस्तक्षेपको आरोप पनि लागेको छ, जसले आन्दोलनलाई थप जटिल बनाएको छ।
प्रगतिशिल युवा संघ नेपालले युवाहरूलाई अपिल गरेको छ । आन्दोलनलाई शान्तिपूर्ण र संवैधानिक बनाउनुहोस्। संघले जेन जिका प्रतिनिधिहरूसँग संवादको लागि तयार रहेको जनाएको छ। उनीहरूका मागहरूलाई नीतिगत रूपमा समेटेर अन्तरिम सरकार गठनको प्रक्रियामा पनि सहभागिता जनाउन सकिन्छ, तर संविधानभित्रै रहँदै।
अन्तमा, प्रगतिशिल युवा संघ नेपालको यो धारणा नेपालको लोकतन्त्रलाई मजबुत बनाउने प्रयास हो। जेन जिका ऊर्जा र उत्साहलाई सही दिशामा मोडेर देशको विकासमा योगदान दिन सकिन्छ। यदि हामी सबै संवैधानिक मार्ग अपनायौं भने, नेपालको भविष्य उज्ज्वल हुनेछ। युवाहरूले हिंसा होइन, संवाद र कानुनी बाटो रोजौं , यही नै प्रगतिशीलताको सच्चा रूप हो।
तपाईको प्रतिक्रिया !