उपेन्द्र यादवको उपस्थितिमा बैठक उम्मेदवार छनौट, वैचारिक स्पष्टता र युवा नेतृत्व विकासमा केन्द्रित छलफल
काठमाडौँ, बैशाख २०, २०८३
जनता समाजवादी पार्टी (जसपा), नेपालले पार्टीको सांगठनिक सुदृढीकरण, वैचारिक स्पष्टता र युवा नेतृत्व विकासलाई केन्द्रमा राख्दै व्यापक छलफल गरेको छ। शनिबार केन्द्रीय अध्यक्ष उपेन्द्र यादवको उपस्थितिमा सम्पन्न अनौपचारिक बैठकमा वर्तमान राजनीतिक अवस्थाको समीक्षा, निर्वाचनपछिको अवस्था र आगामी रणनीतिबारे विस्तृत विचार-विमर्श गरिएको छ।
बैठकमा पार्टीका विभिन्न तहका नेताहरूको सहभागिता रहेको थियो। उनीहरूले पार्टीभित्र सुधारको आवश्यकता, सांगठनिक अवस्था र कार्यदिशाबारे गहन छलफल गरेका छन्।
उम्मेदवार छनौट र समानुपातिक सूचीमा सुधार आवश्यक
बैठकमा आगामी निर्वाचनका लागि उम्मेदवार छनौट प्रक्रिया र समानुपातिक सूची निर्माणमा देखिएका कमजोरीहरूबारे विशेष छलफल गरिएको छ। नेताहरूले कार्यक्षमता, योगदान र मूल्याङ्कनका आधारमा जिम्मेवारी बाँडफाँड गर्नुपर्ने विषयमा जोड दिएका छन्।
४० प्रतिशत युवा प्रतिनिधित्व कार्यान्वयनमा जोड
पार्टीको विधान अधिवेशनबाट पारित हुन नसकेको ४० प्रतिशत युवा प्रतिनिधित्वको व्यवस्थालाई प्रभावकारी रूपमा कार्यान्वयन गर्ने विषयमा पुनः छलफल गरिएको छ। युवाहरूलाई नीति निर्माण तहसम्म पुर्याउने र नेतृत्व विकास गर्ने योजनाबारे पनि विचार आदानप्रदान गरिएको छ।
वैचारिक स्पष्टता र संगठन सुदृढीकरणमा ध्यान
अध्यक्ष उपेन्द्र यादवले पार्टीलाई केवल चुनावी संरचनामा सीमित नराखी वैचारिक शक्तिका रूपमा स्थापित गर्नुपर्ने आवश्यकता औंल्याउनुभएको छ। बैठकमा निम्न विषयहरूमा विशेष ध्यान दिइएको छ:
- सांगठनिक समायोजन र सुदृढीकरण
- वैचारिक बहस र संवाद विस्तार
- युवा नेतृत्व विकास र प्रशिक्षण
- राष्ट्रिय हित केन्द्रित अन्तर्राष्ट्रिय सम्बन्ध
- पहिचान, समावेशिता र सामाजिक न्यायका मुद्दा
- प्रविधिमैत्री पार्टी व्यवस्थापन प्रणाली
“पार्टीमा अब काम गर्नेले उचित स्थान पाउनेछन्। हाम्रो विचार जनतासम्म पुर्याउन र नयाँ पुस्ताको नेतृत्व विकास गर्दै जिम्मेवारी दिनु पर्छ,” अध्यक्ष यादवले बताउनुभयो।
बिभिन्न अभियानबारे छलफल
पार्टीलाई तल्लो तहदेखि सशक्त बनाउने उद्देश्यसहित बिभिन्न अभियान सञ्चालन गर्ने विषयमा पनि छलफल गरिएको छ। यसले पार्टीभित्र नयाँ ऊर्जा ल्याउने र आगामी राजनीतिक यात्राका लागि स्पष्ट दिशा तय गर्ने अपेक्षा गरिएको छ।
तपाईको प्रतिक्रिया !