काठमाडौं – नेपालमा बैंक तथा वित्तीय संस्थामार्फत कर्जा प्रवाहको वृद्धिले निरन्तरता पाएको छ। नेपाल राष्ट्र बैंकले सार्वजनिक गरेको पछिल्लो तथ्यांकअनुसार चालु आर्थिक वर्षको माघ मसान्तसम्म कर्जा प्रवाह ६.९० प्रतिशतले वृद्धि भएको छ।
राष्ट्र बैंकका अनुसार बैंक तथा वित्तीय संस्थामार्फत विभिन्न क्षेत्रमा ५० खर्ब ८८ अर्ब ९ करोड ६३ लाख रुपैयाँ कर्जा प्रवाह भएको थियो। चालु आर्थिक वर्षको सोही अवधिमा थप ३ खर्ब ५१ अर्ब २ करोड ७४ लाख रुपैयाँ कर्जा विस्तार भई कुल लगानी ५४ खर्ब ३९ अर्ब १२ करोड ३७ लाख रुपैयाँ पुगेको छ।
सबैभन्दा धेरै कर्जा वृद्धि भएको क्षेत्रहरू
राष्ट्र बैंकको तथ्यांकअनुसार चालु आर्थिक वर्षमा सबैभन्दा बढी कर्जा वृद्धि बिजुली, ग्याँस र पानी क्षेत्रमा भएको छ। एक वर्षको अन्तरालमा यो क्षेत्रमा ७२ अर्ब ३७ करोड ६ लाख रुपैयाँ कर्जा थपिएको छ।
यसपछि दोस्रो स्थानमा होटल तथा रेस्टुराँ क्षेत्र पर्छ, जहाँ २ खर्ब ५० अर्ब १४ करोड ९५ लाख रुपैयाँ बराबरको लगानी भएको छ। यो गत आवको तुलनामा ११.१२ प्रतिशतले वृद्धि भएको हो।
तेस्रो स्थानमा कृषि, वन तथा पेय पदार्थ उत्पादन रहेको छ, जसमा ९ खर्ब ३९ अर्ब रुपैयाँ बराबरको कर्जा प्रवाह भएको छ। यो अघिल्लो वर्षको तुलनामा १०.१२ प्रतिशतले बढी हो।
चौथो स्थानमा अचल सम्पत्ति, वित्त तथा बीमा क्षेत्र पर्छ, जहाँ ४ खर्ब १५ अर्ब रुपैयाँ बराबरको कर्जा प्रवाह भएको छ। यो गत वर्षको तुलनामा ९.०६ प्रतिशतले बढी हो।
पाँचौं स्थानमा उपभोग्य कर्जा रहेको छ, जसमा ८.९९ प्रतिशत को वार्षिक वृद्धि भएको छ। कुल कर्जामा उपभोग्य वस्तुको हिस्सा १९.७४ प्रतिशत रहेको छ।
निर्माण क्षेत्र र अन्य क्षेत्रमा पनि कर्जा प्रवाहको वृद्धि
निर्माण क्षेत्रमा ६.७९ प्रतिशत कर्जा विस्तार भई कुल २ खर्ब २६ अर्ब रुपैयाँ लगानी भएको छ। साथै, माछापालनमा ३.९२ प्रतिशत, थोक तथा खुद्रा व्यापारमा २.९४ प्रतिशत, स्थानीय सरकार तथा अन्य सेवाहरूमा कर्जा प्रवाह बढेको छ।
पाँच क्षेत्रको कर्जा संकुचन
यस वर्ष यातायात, सञ्चार, सार्वजनिक सेवा, खनिज, कृषि तथा वन उत्पादन, धातुजन्य उत्पादन, मेसिनरी र इलेक्ट्रोनिक्स जस्ता पाँच क्षेत्रमा भने कर्जा प्रवाह घटेको देखिएको छ।
उत्पादनशील क्षेत्रमा लगानी बढाउनुपर्ने सुझाव
अर्थविद् डा. रामकुमार फुँयालका अनुसार नेपालमा कर्जा प्रवाहको आकार बढ्दै गए पनि त्यसको प्रतिफल राम्रो देखिएको छैन। उनले भने, “कर्जा प्रवाह उत्पादनशील क्षेत्रभन्दा सेवा क्षेत्रमा बढी भएकाले दीर्घकालीन रूपमा आर्थिक वृद्धिमा टेवा पुग्न सकेको छैन।”
उनका अनुसार बैंक तथा वित्तीय संस्थाले कृषि, उद्योग, साना उद्यमी, गरिब किसान र नवप्रवर्तकहरूलाई प्राथमिकता दिनुपर्ने आवश्यकता रहेको छ। उत्पादनशील क्षेत्रमा लगानी बढाउन राष्ट्र बैंक र सरकारको नीति स्पष्ट हुनुपर्नेमा उनले जोड दिए।
तपाईको प्रतिक्रिया !