नेपालगञ्ज, – स्वास्थ्य तथा जनसंख्या मन्त्री प्रदीप पौडेलले पूर्वविशिष्ट व्यक्तिहरूलाई राज्यबाट अतिरिक्त सुविधा दिन नहुने बताएका छन्।
नेपाली कांग्रेस बाँकेले आयोजना गरेको कार्यकर्ता भेटघाट कार्यक्रममा बोल्दै मन्त्री पौडेलले पूर्वविशिष्ट व्यक्तिहरूलाई सम्मान गर्नु उचित भए पनि राज्यको ढुकुटीबाट अतिरिक्त सुविधा उपलब्ध गराउनु अनुचित हुने उल्लेख गरे।
नेपालगञ्ज मेडिकल कलेजको समस्या कलेज प्रशासनले समाधान गर्नुपर्ने
नेपालगञ्ज मेडिकल कलेजका विभिन्न समस्याहरूबारे चर्चा गर्दै उनले ती समस्याहरू कलेज प्रशासनले नै समाधान गर्नुपर्ने धारणा व्यक्त गरे। उनले मेडिकल कलेजहरू नीति र नियमअनुसार चल्नुपर्ने भन्दै राज्यले निर्धारण गरेका सम्पूर्ण मापदण्डहरू पालना नगरे सम्बन्धन खारेज गर्न सकिने चेतावनी दिए।
अस्पतालका श्रमिकलाई श्रम ऐनअनुसार तलब दिनुपर्ने
मन्त्री पौडेलले अब कुनै पनि सरकारी, निजी तथा सामुदायिक अस्पतालका दक्ष जनशक्तिलाई श्रम ऐनअनुसार पारिश्रमिक नदिए ती अस्पतालको सम्बन्धन खारेज गरिने स्पष्ट पारे।
औषधि मूल्य समायोजन र स्वास्थ्य बीमा विस्तारको तयारी
औषधिको मूल्य समायोजनका लागि सरकारले ठोस कदम चाल्न लागेको जानकारी दिँदै राष्ट्रिय उत्पादनलाई प्रोत्साहन दिने गरी नीति ल्याउन लागिएको उनले बताए।
स्वास्थ्य बीमालाई प्रभावकारी बनाउन सरकार प्रतिबद्ध रहेको उल्लेख गर्दै ६६ लाख घरपरिवारलाई बीमा योजनामा समावेश गर्ने लक्ष्य रहेको उनले जानकारी दिए।
आधारभूत अस्पतालहरू पूर्ण क्षमतामा सञ्चालन गरिने
स्थानीय तहमा स्वास्थ्य सेवा विस्तारका लागि सरकारले धेरै लगानी गरिसकेको उल्लेख गर्दै मन्त्री पौडेलले आधारभूत अस्पतालहरूलाई पूर्ण क्षमतामा सञ्चालन गरिने प्रतिबद्धता व्यक्त गरे।
कार्यक्रममा नेपाली कांग्रेस बाँकेका नेताहरू, कार्यकर्ता तथा स्थानीय नागरिकहरूको उपस्थिति रहेको थियो।
यो खबर पढेर तपाईलाई कस्तो महसुस भयो ?
तपाईको प्रतिक्रिया
