दार्चुला — दार्चुला जिल्लाको मार्मा गाउँपालिका अन्तर्गत लटिनाथ माध्यमिक विद्यालयको नजिकै मादक पदार्थ (रक्सी, बियर, लगायतका नशालु पेय पदार्थहरू) खुलेआम बिक्री–वितरण भइरहेको पाइएको छ। स्थानीय स्रोतहरूका अनुसार विद्यालय क्षेत्र वरपर यस्तो अवैध गतिविधि गाउँपालिका प्रशासन र जनप्रतिनिधिहरूको मौन सहमति वा प्रत्यक्ष मिलोमतोमा चलिरहेको आशंका गरिएको छ।
विद्यालय वरपर मादक पदार्थ खुलेआम बिक्री हुन थालेपछि विद्यार्थीहरूको शिक्षामा असर परेको छ भने अभिभावकहरू पनि बालबालिका र किशोरहरूको सुरक्षाका विषयमा गम्भीर चिन्तित भएका छन्।
एक अभिभावकले भने, “विद्यालय नजिकै रक्सी बेचिनु शिक्षा क्षेत्र र सामाजिक मर्यादाका लागि खतरा हो। यस्तो कुरामा स्थानीय सरकार चुप लागेर बसेको छ भन्ने लाग्छ।”
स्थानीय युवाहरूले पनि यस्तो कार्यले युवाहरूलाई नशाको दलदलमा धकेल्ने खतरा रहेको भन्दै तत्काल नियन्त्रण गर्न माग गरेका छन्।
यद्यपि गाउँपालिका प्रशासनले हालसम्म यसबारे कुनै आधिकारिक प्रतिक्रिया दिएको छैन। केही स्थानीय बासिन्दाले गाउँपालिकाभित्रकै केही व्यक्तिहरूको संरक्षणमा यस्तो कारोबार भइरहेको दाबी गरेका छन्।
सामाजिक विकास, शिक्षा र सार्वजनिक स्वास्थ्यमा नकारात्मक असर पार्ने यस्ता गतिविधिबाट विद्यालय क्षेत्रलाई सुरक्षित राख्न प्रहरी प्रशासन, गाउँपालिका र नागरिक समाज सबैको पहल आवश्यक देखिन्छ।
यो खबर पढेर तपाईलाई कस्तो महसुस भयो ?
तपाईको प्रतिक्रिया
