काठमाडौं, २०८२ जेठ १० – त्रिभुवन अन्तर्राष्ट्रिय विमानस्थलस्थित अध्यागमन कार्यालयसँग जोडिएका पछिल्ला घटनाहरूमा गृह मन्त्रालयको नेतृत्वलाई लक्षित गर्दै विभिन्न सञ्चारमाध्यम तथा सामाजिक सञ्जालमा आएको समाचारप्रति मन्त्रालयले गम्भीर ध्यानाकर्षण जनाएको छ। मन्त्रालयले शनिबार एक प्रेस विज्ञप्ति जारी गर्दै प्रकाशित/प्रसारित समाचारहरू कपोलकल्पित, भ्रामक र आधारहीन रहेको बताएको छ।
सिंहदरबारस्थित मन्त्रालयले जारी गरेको विज्ञप्तिमा भनिएको छ, “यस्ता कुनै पनि गैरकानुनी वा भ्रष्टाचारजन्य कार्यमा मन्त्रालयको नेतृत्वको कुनै संलग्नता छैन र हुन सक्दैन भन्ने कुरा स्पष्ट गर्दछौं।” मन्त्रालयले उक्त घटनाको अनुसन्धान कार्य अख्तियार दुरुपयोग अनुसन्धान आयोगमार्फत भइरहेको जानकारी दिंदै अनुसन्धानपछि सत्य तथ्य बाहिर आउने उल्लेख गरेको छ।
विज्ञप्तिमा गृह मन्त्रालयले स्पष्ट रूपमा भनेको छ कि मन्त्रालय शून्य सहनशीलताको नीतिमा प्रतिबद्ध रहँदै शान्ति, सुरक्षा र सुशासन कायम गर्न क्रियाशील छ। अध्यागमन कार्यालयमा देखा परेका अनियमिततासम्बन्धी आयोगले गरिरहेको अनुसन्धानलाई पूर्ण सहयोग रहने मन्त्रालयको भनाइ छ।
साथै मन्त्रालयले सञ्चारकर्मी, सामाजिक सञ्जाल प्रयोगकर्ता तथा सरोकारवालाहरूलाई सत्यतथ्य मात्रमा आधारित समाचार प्रकाशन र प्रसारण गर्न आग्रह गरेको छ।
गृह मन्त्रालयका सहसचिव छवि रिजालद्वारा हस्ताक्षरित उक्त प्रेस विज्ञप्तिमा भनिएको छ, “मन्त्रालय गृह प्रशासनलाई व्यवस्थित गर्न नीतिगत तथा संस्थागत सुधारका कार्यहरू समेत गर्दै आइरहेको छ।”
यसअघि विमानस्थल अध्यागमनमा सुईमा लुकाइएको पाउना (गहना) भेटिएको घटनाले देशव्यापी चर्चा पाएको थियो। उक्त घटनालाई लिएर मन्त्रालयका केही उच्च पदस्थ व्यक्तिहरूको सरुवासमेत भएको चर्चा चलेको थियो। तर मन्त्रालयले यस्ता चर्चाहरूप्रति आपत्ति जनाउँदै अनुसन्धान सम्पन्न नभएसम्म कुनै निष्कर्षमा नपुग्न आग्रह गरेको छ।
यो खबर पढेर तपाईलाई कस्तो महसुस भयो ?
तपाईको प्रतिक्रिया
